රජයේ රැකියා ලබාදීමේ ක්‍රමවේදයට එරෙහිව පැවති විරෝධතා පෙළපාලි හේතුවෙන් දින කිහිපයක සිට පවතින ප්‍රචණ්ඩ ගැටුම්වලින් පසුව රට සම්පූර්ණයෙන්ම වසාදැමීමට උත්සාහ කළ ශිෂ්‍ය විරෝධතාකරුවන් සහ බංග්ලාදේශයේ පොලිසිය අතර උග්‍ර ගැටුම් හටගෙන තිබේ.
ප්‍රංශ පුවත් සේවය වාර්තා කළේ මෙම ප්‍රචණ්ඩ ක්‍රියාවලින් මියගිය සංඛ්‍යාව 32 දක්වා ඉහළ ගොස් ඇති බවයි.
රට පුරා ප්‍රබල වාර්තාකරුවන් ජාලයක් සිටින ඩකා හි ප්‍රමුඛ පෙළේ ප්‍රොතොම් ඇලෝ පුවත්පත සඳහන් කරන්නේ සිකුරාදා වන විට එරට අගනුවර වන ඩකා සහ තවත් නගර කිහිපයක දරුණු ප්‍රචණ්ඩත්වයක් පවතින බවයි.
ප්‍රචණ්ඩ ක්‍රියා හේතුවෙන් තවත් සිය ගණනක් තුවාල ලබා ඇති බව බංග්ලාදේශයේ දිනපතා පුවත්පත් පවසයි.
1971 පාකිස්තානයෙන් නිදහස් වීමේ යුද්ධයේදී සටන් කළ පුද්ගලයන්ගේ පවුල් සඳහා රජයේ රැකියාවලින් සියයට 30ක් වෙන්කිරීම නවත්වන ලෙස විරෝධතාකරුවෝ එරට ආණ්ඩුවට බලකරති. ප්‍රචණ්ඩ ක්‍රියා පාලනය කිරීම සඳහා රට පුරා දුරකතන ජාල අවහිර කිරීමට එරට අගමැති ෂීක් හසීනාගේ ආණ්ඩුව පියවර ගෙන ඇත. ඇතැම් ස්ථානවල සමාජ ජාලා ද අවහිර කර ඇති බවට පුවත් පළවේ.