අද තරගයට බොහෝ දුරට දිනේෂ් චන්දිමාල් එක්වනු ඇති බවත් ශ්‍රී ලංකා කණ්ඩායම තරගය සඳහා ඉතා හොඳ මානසික මට්ටමකින් පසුවන බවත් ශ්‍රී ලංකා නායක දසුන් ශානක පවසයි.
ඔහු ඒ බව පවසා සිටියේ තරගාවලියට ප්‍රථම පැවැත්වෙන මාධ්‍ය හමුවේදී අදහස් දක්වමිනි.
දෙරට අතර මෙම එක්දින තරග තුන පැවැත්වෙන් අයි සී සි සුපර් ලීග් තරගාවලිය යටතේය.
2023 එක්දින ලෝක කුසලාන තරගාවලියට සෘජුව සුදුසුකම් ලැබීමට නම් ශ්‍රී ලංකා කණ්ඩායම ඇෆ්ගනිස්තානය සමග පැවත්වෙන මෙම තරග තුනම අනිවාර්යයෙන් ජයගත යුතු වෙයි.
මෙම එක්දින තරගාවලියට එක්වන ශ්‍රී ලංකා සංචිතය ශ්‍රී ලංකා ක්‍රිකට් ආයතනය ඊයේ (24) නිවේදනය කළේය.
ක්‍රීඩකයින් 16 දෙනෙකුගෙන් යුත් එම සංචිතයට දුනිත් වෙල්ලාලගේ සහ ධනංජය ලක්ෂාන් කැඳවා තිබේ.
ශ්‍රී ලංකාව සහ ඇෆ්ගනිස්තානය අතර මේ දක්වා එක්දින තරග 4ක් පවත්වා ඇති අතර ඉන් තරග 3ක් ශ්‍රී ලංකාව ජය ගැනීමට සමත්වුණි.
තරග තුනකින් සමන්විත තරගාවලිය මහනුවර පල්ලේකැලේ ජාත්‍යන්තර ක්‍රිකට් ක්‍රීඩාංගනයේදි පැවැත්වීමට නියමිතව ඇත.