සවනට ඇහෙන දුරකින් වෙරළක සද්දේ
මිතුරන් සිව්දෙනෙක් හා හිදගෙන මැද්දේ
ඉන්න අතුරතුර මධු මී බිඳු යුද්දේ
ආගිය කතා ඒ මැද අපි ගොඩ ඇද්දේ
වික්‍රම බෝගොඩත් සමගින් බීපු මම
සිද්ධිය ඇදී ආවා කයියෙහිදි එම
ගොළු හදවතට පෙම් කළ යහළුවන් හැම
පෑවා කතාවට දෙසවන් තදින් තම
වාගේ බීර විතකින් විසිරෙනා පෙණ
ඒ මධු අන්දරය අහලා වයින් වුණ
එකපාරටම වගෙ මිතුරෙක් පෙරට පැන
දැම්මා ප්‍රශ්නයක් මම ඇඹරිලා යන
කරමින් යමක් යහමින් කයියකුත් ගසා
ඔහුගෙන් අතීතයෙ රස තොරතුරුත් අසා
හමුවී නැතත් හමුවුණි නම් ලැබෙන තොසා
නළුවා කවුද කියමුද නොකියමින් මුසා
වීරයො වගෙම විකටයො සහ ප්‍රතිවීර
හිටියත් නළුවො එකසිය ගාණට මාර
මිතුරා ඇසූ පැනයට නම් එකපාර
ආවේ මතකයට නානායක්කාර
ඇති සැටියෙන්ම ඇති තතු සමයෙහි පෙරකී
දැනගන්නට රහට ඇරගත යුතු දොරකී
සමහර කතා ඇහුවම නම් යයි කැරකී
මේ ආතල් එකේ කරටියෙ හිටි පොරකී
හමුවුණු නොවුණු නළුවන් නම් ඇත බොහොම
එක් එක්කෙනා ගැන පවසන්නද කොහොම
ඒ අය ගැන දුරට තව ලිව්වොත් එහෙම
එය මහ පොතක් වෙනවා නිසැකයි රහම
හමුවී වරක් කොස්තා රිට්ස් එක ඇතුලේ
අඩියක ගැටී ඉද්දී කයියක පතුලේ
ආගිය කතා මිනිහා හෙමිහිට මතුලේ
ඒවා අහන් හිටි මගෙ නිල් විය රතු ලේ
නළුවොයි කියා නම් මහ ලබ්බක් නැත්තේ
එනමුත් පෙළක් උන් සෑහෙන සිත් ගත්තේ
උන්ගේ ළග ඉතා රසවත් තතු ඇත්තේ
හාරා අවුස්සා ඒව ගත යුත්තේ
තම කාරියෙහිදී අල්ලා නිසි විරිත
ඉන් මෙපිටදි ඉතිං ආනන්දෙන් බරිත
ඔබගෙත් හිතේ ඇත්නම් මේ වැනී චරිත
ලියලා යනු යටින් ඒකයි හොද සිරිත