කාම්බෝජ විපක්ෂ නායක කෙම් සෝකා වසර 27ක් නිවාස අඩස්සියේ තැබීමට එරට අධිකරණය නියම කර තිබේ.
අගමැති හුන් සෙන්ගේ රජය පෙරලා දැමීම සඳහා විදේශ බලවේග සමඟ කුමන්ත්රණය කළ බවට ඔහුට චෝදනා එල්ල වී තිබිණි.
විදෙස් වාර්තා වල සඳහන් ආකාරයට වසර තුනක් පුරා පැවැති නඩු විභාගකින් අනතුරුව මෙම දඬුවම නියම කර ඇත.
එමෙන්ම කෙම් සෝඛා හට මැතිවරණ සඳහා පෙනී සිටීමට මෙන්ම ඡන්දය ප්රකාශ කිරීම ද තහනම් කර තිබේ.
මීට පෙර ඔහු නියෝජනය කළ කාම්බෝජ ජාතික මුදා ගැනීමේ පක්ෂය තහනම් කිරීමට ද එරට රජය පියවර ගත්තේ ය.
69 හැවිරිදි කෙම් සෝඛා 2017 දී ප්රථම වරට අත්අඩංගුවට ගනු ලැබුවේ, වීඩියෝ පටයක් පදනම් කරගෙනය.
කෙසේවෙතත් කෙම් සහ ඔහුගේ නීතිඥයින් සිදුකර ඇති චෝදනා ප්රතික්ෂේප කර ඇති අතර ඔහුට එරෙහි නඩුව පදනම් විරහිත බවද පවසා ඇත.
කාම්බෝජයේ එක්සත් ජනපද තානාපති පැට්රික් මර්ෆි සිකුරාදා කියා සිටියේ මෙම නඩුව යුක්තිය පැහැර හැරීමක් බවයි.
එමෙන්ම කෙම් සොඛා ගේ නීතිඥවරුන් පැවසුවේ අදාළ තීන්දුවට එරෙහිව අභියාචනයක් ඉදිරිපත් කරන බවද පවසා ඇත.
අගමැති හුන් සෙන් යනු 1985 වසරේ සිට ලෝකයේ දීර්ඝතම කාලයක් බලයේ රැඳී සිටින ඒකාධිපතියෙත් ලෙස ප්රකටය.
ඔහු එළැඹෙන ජූලි මාසයේදී පැවැත්වීමට නියමිත මහ මැතිවරණය සඳහා තරග කරනු ඇතැයි පැවසුනද එරට දේශපාලන මාධ්ය වාර්තා සඳහන් කරන ආකාරයට ඔහුගේ වැඩිමහල් පුත් හුන් මැනට් වෙත බලය පැවරීමට ඔහු සැලසුම් කර ඇති බවද පැවසේ.